هل ما زال سمير الحياري نائماً ..؟؟
كتبهاكامل النصيرات ، في 26 كانون الأول 2006 الساعة: 01:00 ص
***
هل ما زال سمير الحياري نائماً ..؟؟
***
صحا سمير الحياري من النوم الصبح زي دايماً ..فرك عينيه ..شاوَرَ نفسه : هل أغسِّلْ وجهي هسه وإلاّ بعدين..؟؟ وراح قايم على الحنفيّة..وهو في طريقه إليها ..قال لنفسه مجدّداً : لأ ؛ الكمبيوتر أقرب من الحنفيّة ..خلّيني أفتح على موقعي ( عمّون ) وبعدها أغسِّل وجهي ..!! فتح الكمبيوتر..فتح على عمّون ..أصبرْ شوية ؛ هسّة بتطلع..!! هكذا حدث نفسه واستمر في ذلك : لأني قايم من النوم بصلتي محروقة..لا تستعجل ..هسّة بعبّي الموقع ..بس الموقع طوّلْ كثير ومش بالعادة يعمل هيك …إيه وبعدين ؟؟..يمكن أنا لسّه نايم وبحلم ..خلّيني أغسِّل وجهي..حتى أتأكّد إني مِشْ نايم ..!! راح مثل الطَلَقْ عَ المغسلة ( رغم أنه ثقيل المشية بسبب كسر رجله )..طسّ وجهه سبع مرّات بميّة باردة ..ورجع لموقع عمّون ..برضو مش راضي يفتح..!! شكّ أنه ما زال نائماً ..قَرَص حالو أكثر من عشرين قرصة ..وحدة بالبطن و وحدة بالإيد..ووحدة بالوجه..و..و..!! المهم مش زابطة ..ولا راضي يفتح الموقع ولا ( فُتِّيْحة )..!! برضو الزَّلَمة ما شك بحدا ..وما زال يصر على الشك بحاله على أنه نايم..لذا ..قال لنفسه: سأعمل تمرين رياضي أخلّي كل شي نايم فيّ يصحى..!! وراح واقف عند الباب ؛ وزي الطير ركض مسرعاً و ضرب جنبه بالحيط إللي قباله..وزي الطير ركض كمان ضرب حاله بالحيط الثاني وهو يصرخ ويقول : اصحى يا سمير ؛ خلّص الحلم يا سمير ..واستمر يضرب بحاله من حيط لحيط ؛ لَحَدْ ما انهد حيلو..وتأكّد بأنه أخيراً صحا ..واتجه من فوره للكمبيوتر مجدّداً..فتح على موقع عمّون..ولا راضي يفتح..تأكدَ من النت ؛ مشبوك..من الكهرباء؛ شاعلة..تأكّد من كل شيء إلاّ من أنه ما زال نائماً ويحلم..!!
قال : سأخبر الشرطة وأقوللهم انسرق موقع عمّون..آه..بس إذا طلعت بحلم ؛ مش حلوة بحقّي..؟؟ وفش بالشرطة قسم لسرقة الأحلام..طّيّبْ.. أحكي مع خبراء في الانترنت أقوللهم : الموقع مش راضي يطلع..بس خايف يقولولي : الموقع ( طِلِع ) مشوار وزمانو جاي..!! وبعدين مع هالشغلة..؟؟..إشيْ يلْوِقْ لسان المُخْ..ويبطنج رجلين العقل ..ويطيّر ضبان الدماغ..!! معقول بحلم ولمّا أصحى رح ألقى موقع عمّون زي ما هو ..وإلاّ..معقول موقع عمّون كان هو الحلم وأنا هسّة صحيتْ..؟؟
ويقال بأن سمير الحياري ما زال يردِّد : يا ناس قولولي :هل أنا ما زلتُ نائماً وأحلم ..وإلاّ كنتُ نائماً وأحلم ..وصحوت ..!! مِشان الله احكو لسمير ..صحيح مين سمير ..؟؟ لأكون أنا الثاني أحلم برجل فتح موقعاً اسمه ( عمّون ) وصحوت الآن ..وبالأصل لا فيه عمّون ولا حتى هناك رجل اسمه سمير الحياري..؟؟!!
…
ـــــــــــــــــــــــــــــــــــــــــــــــــــــــــ
التصنيفات : غير مصنف | أرسل الإدراج | دوّن الإدراج
يوليو 12th, 2007 at 12 يوليو 2007 11:21 ص
قصة بطير ضبنات العقل !!!!!!!!!!
دمت
….اختك الفراشة الوردية….
أغسطس 3rd, 2008 at 3 أغسطس 2008 11:59 ص
غسل وجهه سبع مرات ما ظبطت معك عمنا كامل باشا .. لأنه ممكن واحد ييجي وساخذها على قافية . . غسل وجهه سبع مرات إحداهن بالتراب .. صح ولا لأ..
شكرا لك على كلماتك المعسلة