زاوية يومية ساخرة اسمها تـنـفـيـيـيـس ؛ تُـنْـشَر بالتزامن مع صحيفة الدستور الأردنية..للمراسلة على الإيميل التالي ( abo_watan@yahoo.com ) ..خلوي : 00962777870203

حكاية الطفرانين الأربعة و المسؤول

كتبهاكامل النصيرات ، في 31 كانون الثاني 2007 الساعة: 01:00 ص

حكاية الطفرانين الأربعة و المسؤول

أربعة أصدقاء..طفارى..إلهُمْ أسبوع ما تحمّموا ولا غيّروا ملابسهم لا الخارجية ولا الداخلية ؛ ولا أكلوا وجبة ( شَبَع )..المشكلة أنهم لا يشتكون ..بس ؛ انقطعوا في منطقة وما عرفوا كيف يتدبرون أمور الترويحة ..!! واحد قال : اسمعوا ؛ ما إحنا ماكلين هوا ماكلين..تعالوا نوخذ تكسي وعند ما يوصلنا الشوفير لأقرب منطقة نترفش ببطنه ونقول له : حِلْ و اقلبْ وجهك من هون ..!! والثاني قال : لأ ؛ هيك بننفضِحْ..الحل نتصل تلفون بأي قرابة إلنا يخلِّصنا من هالورطة ..!! الثالث ضحك عَ الثاني وقال : يا بني آدم ومن وين بدنا نحكي تلفون وإحنا ( مْلَبْيين ولا إللي ترن أو تدق ) ..!! الرابع جعر جعرة أرخميدس المشهورة وقال : وجدتها ؛ إلْقيتها ؛ كانت تايهة و إلقيناها يا شباب ..!! تجمّعوا عليه وقالولوا : احكي ..شو ..؟؟ قال وهو يزبِّط بـِ ( قبّة ) قميصه المهرية من أكثر من مكان : شوفوا ..ما حدا بيتحملنا غير الدولة ..الدولة أولى بينا من غيرنا ..!! قالولوا : والله بتحكي صح وكلامك عسل ..بس كيف ..؟؟ قاللهم : إحنا بنطلع على أي دائرة حكوميّة هسّة ..وبنقنع المسؤول إللي فيها إنو فيه موضوع ضروري وعاجل ولا يؤجّل ؛ وإذا تأجل رَحْ ياكل هوا وينخرب بيتو ولازم يطلع معنا شخصي بسيارتو..طبعاً المسؤول رح يخاف على حالو وعلى الكرسي إللي تحتو ( أبو أربع عجال )..و رَحْ يْفِزْ بسرعة و يطَلِعنا بسرعة معه ..وإحنا نخلّيه يوصلنا لأقرب نقطة إلنا ونقول للمسؤول : خَلَصْ هون وقِّفْ .. وبعد ما يوقِّفْ ..بسرعة نفتح أبواب السيارة وننط منها ونوخذها رَكِضْ قَدْ مانقدر ؛ يعني نفكح من قدام وجهه ؛ لَحَدْ ما نطمئن أن الأمور سارت على ما يُرام ..!!

تهللتْ أساريرُ الشباب الطفرانين و كيّفوا على خطة صديقهم ..وبدأوا في تنفيذها ..وتمّ لهم ما أرادوا ..فقد وجدوا مسؤولاً ( خايف و مْقَرْقِطْ ) بالكرسي ؛ طلّعهم معه في سيارته ..وعندما وصلوا أقرب نقطة لمكانهم ؛ قالولوا : هون ..أيوة هون ؛ يعطيك العافية..!! وفتحوا أبواب السيارة ..وأخذوها ركض ..ظلّوا يركضون ..هذا شارع يدخلون فيه ..هذه زقّة يزقّون فيها ..هذا نفق ؛ينفقون منه وهم يركضون بلا توقُّف ..إلى أن وجدوا عمارة حديثة البناء ولسّة عَظِمْ ومش مشطّبة ..دخلوا فيها بسرعة ..الطابق الأول ..الثاني..الثالث ..المُهم عَ الطابق الأخير إللي أَبْصَرْ قديش ترتيبه ..وهناك كل واحد اخفى نفسه بشكل طولي وراء ( شمعة ) من ( الشُّمَع ) وكتموا أنفاسهم ولا واحد شايف صاحبو من الخوف..مرّتْ عشر دقائق..عشرون ..ثلاثون ..أربعون..تعبوا..ملّوا من الوقفة والاختباء..فتجرّأ أحدهم وسأل أقرب واحد إليه بصوت خافت : بالَكْ ؛ شو صار بالمسؤول ..؟؟ فردّ عليه بصوت خافت أيضاً: أنا المسؤول ؛ هو شو فيه ..؟؟

أضف الى مفضلتك