محاولة فاشلة لإلقاء القبض على العيد
كتبهاكامل النصيرات ، في 10 تشرين الأول 2007 الساعة: 18:46 م
محاولة فاشلة لإلقاء القبض على العيد
**
الشوارع مزدحمة ..في عمّان ..الشرقيّة والغربيّة ..البنات هايصات و طالعات آخر صرعة من الصيام ( والشاطر يمسك عليه صيامه ) وبالنسبة لي أنا ؛ فأنا شاطر عَ الآخر ..قلتُ لكم زحمة ..بس ما قلتُ لكم أن الناس مستعجلة ..بل مستعجلة جداً..ليش مش عارف..؟؟!!
الشوارع مزدحمة ..في صويلح ..السيارات فوق بعض والناس ماشية مستعجلة برضو ..بس ما حدا حامل شي ..إلا الحامل هي الوحيدة إللي حامل ..بس الكشرة الأردنية عاملة عمايلها ..ما تقدر تحكي مع أي واحد ..روح أي واحد في مناخيرو ..وكأن مناخيرو ناقصة ..!!
الشوارع مزدحمة ..ويا ويل إللي معه مغص ..أو..سَلَسْ بول ..يا حرام شو رح يصير فيه ..تجرّأت أنا وسألتُ أحدهم : بالله يا خوي وين ..؟؟ ولسّة ما كمّلتْ ؛ قطع علي وقال وهو يبتعد عني : أنا مش من هون ..!! قلت لحالي : ما علش ..نسأل واحد من هون …وقفتُ عند آخر ..برضو مش من هون ..وثالث ورابع ..كلهم مش من هون ..باستثناء الخامس ؛ ربنا الله كان جوابه مختلفاً ..فقد قال : ما أعرفش حاجة هنا ؛ لسّة واصل يا بيه ..!! إذن ..كلهم مش من هون ..من هو إللي من هون ..؟؟!!مشان الله واحد من هون ..!!
الشوارع مزدحمة ..السلط بطلوع الروح طلعت منها ..معقول كل الناس انهبلت ..والمصاري هسّة بيّنتْ عليهم ..بس مش حاملين شيْ ..!!
الشوارع مزدحمة ..حتى قريتي الكرامة ..الأزمة فيها مش طبيعيّة ..يعني مش زي كل سنة ..بس برضو الناس مش حاملة إشي عليه العين ..والناس مستعجلة وكأنو فيه حدا لاحقهم بعصاة ..ويا دوب تسمع كلمة ( مرحبا أو السلام عليكم ..) ..تسمعها هكذا ( حبا ) عن مرحبا ..و ( سما ليكم ) عن السلام عليكم ..!!
سرعة الناس جنونية .. سألت أكثر من واحد ..أحاول أن أفهم ..الكل أجمع على أنها أزمة العيد ..يعني الكل يحاول أن ( إيْعَيِّدْ ) بدلاً من أن ( إيْعَيِّطْ ) ..!! آآآآآآه ؛ الآن فهمتُ ..هم يحاولون أن يلحقوا بالعيد قبل أن ( يشرد ) منهم ..!! آه ..وما زالوا منذ عشتُ وهم يبحثون عنه ..وكل الناس الفايعة وإللي مش من هون ولا إللي من هناك ؛ كلهم يبحثون عن العيد ..ولم يجدوه بعد ..لأن الذي يجده مرصودة له جائزة قيمة ..ألا وهي ( أنه وجد العيد ) يعني جائزته أنه رح ( إيْعَيِّدْ ) ..!! يا حراااااام ؛ يعني كل الناس المستعجلة لم تلقِ القبض على العيد بعد ..يا ترى وين متخبّي ( المستر عيد بن سعيد ) ..؟؟!!
ـــــــــــــــــــــــــــــــــــــــــــــــــــــــــ
التصنيفات : مقال ساخر | السمات:مقال ساخر
أرسل الإدراج | دوّن الإدراج
أكتوبر 10th, 2007 at 10 أكتوبر 2007 11:21 م
يا كامل أنا بعد مش من هون .؟؟.. بس أنا من هناك .. يعني عنواني معروف ( هناك ) بس ليش بدور على بن عمي ( العيد ) ..؟..
لا علم لي إن كان لي بن عم عندكم ..!!.. المهم إذا مر عليك ابن عمي (العيد ) سلملي عليه ..
كل عام وأهل الأردن الأعزاء بآلف خير ..
أكتوبر 11th, 2007 at 11 أكتوبر 2007 11:39 ص
ربما يقبع العيد مختبئا خلف شواهد القبور في العراق أو تحت فواتير الديزل و الكهرباء… أو ربما وراء جدار أمني في ضفة غربية… أجرؤ أن أقول أني رأيته يتنقل بين عيون أطفال لا تزال في إنتظار عودة أبيهم لقطاع محاصر… أو ربما… إيه ربما سيشارك في مؤتمر خريفي بعيدا عن كل المسلمين…
أكتوبر 11th, 2007 at 11 أكتوبر 2007 10:14 م
أسعد الله أوقاتك أستاذ كامل .
دعني أعبر لك عن أعجابي بقلمك متمنيا لك في نفس الوقت كل التوفيق.
عيدكم مبارك و تقبل الله منا و منكم .
أصدق التمنيات
أكتوبر 12th, 2007 at 12 أكتوبر 2007 12:17 م
الأستاذ كامل…أنت من نجحت في القبض على العيد عبر هذا النص المميز…عيد مبارك سعيد وكل عام وأنت وأسرتك الكريمة بألف خير…
دام لك الحضور و التجلي…
أكتوبر 13th, 2007 at 13 أكتوبر 2007 6:19 ص
من يقبض على العيد هو من يستمتع به , أما من لا يجد الإستمتاع فالعيد بيهرب منه ولا بيلاقيه حتى لو عمل إيه!!!!!!!!!!!!!!!
كل سنة وانت طيب , أستاذي العزيز ,وأتمني من الله أن تكون ممن وجدوا العيد
حمادة زيدان
أكتوبر 13th, 2007 at 13 أكتوبر 2007 6:50 ص
العيد هنا .. في قلب كل منا .. في بسمة أطفالنا .. وفي تكبيرات صلواتنا..
واللي مش من هون .. ما راح يقدر إيعيد ..
كل عام ونصك يضحكني .. وسخريتك عليهم تكشفهم .. وتدفعهم نحو معناها .. ليعرفو مكان الإحساس في بطحات الشلل..!
لك تحيتي
أكتوبر 13th, 2007 at 13 أكتوبر 2007 12:31 م
اتقدم لكم باسمى ايات الود المعطرة بالاماني والتبريكات المخلصة بمناسبة حلول عيد الفطر المبارك
داعيا الله القديران يعيده علينا وعليكم وعلى الامة الاسلامية بالصحة والعافية والسلامة والنصر المبين واليقين في المولى عز وجل
تقبل الله منا ومنكم
تحيتي ومودتي
أكتوبر 19th, 2007 at 19 أكتوبر 2007 7:58 م
انا اسف على الكلام الي بدي احكيه
بس انا عندي تعليق على شخص السيد كامل
السيد كامل انت ما بتعرف تكتب وما عندك روح كتابه
حتا انا بعتقد انه في اسم يلوق لك اكثر من الكاتب الساخر
وهو اسم الكاتب التافه لانك فعلا عباره عن تافه
وكتاباتك غير متزنه وغير منسقه
عيب عليك